O primeiro premio foi para a artista e docente Mar Caldas
Dar a coñecer unha serie de investigacións de diferentes ámbitos, que teñen na creatividade o seu nexo de unión, era o obxectivo da xornada promovida este venres polo Campus Crea, co apoio do Consello Social da UVigo, na Escola de Enxeñaría Forestal, onde dez estudantes de doutoramento deron a coñecer as súas liñas de traballo. Este encontro completouse co acto de entrega dos V Premios Crea, destinados a recoñecer estudos, publicacións e obras conectadas coas catro áreas do proxecto de especialización do campus de Pontevedra, que afondan nas conexións da creatividade coa arte, o deseño, a comunicación e a educación.
Promovidos co apoio da Deputación de Pontevedra, o premio correspondente á categoría dirixida ao persoal docente e investigador foi para o proxecto Retrato de familia, no que a artista e profesora de Belas Artes Mar Caldas reflexiona sobre a súa historia familiar para denunciar a violencia exercida pola ditadura franquista. Xurdido a partir da súa película 12 de maio de 1937, que toma o seu título da data na foi fusilado o seu avó materno e que Caldas presentaba recentemente en Cuba, este proxecto deu lugar a un conxunto de obras, reunidas a comezos deste 2025 nunha exposición que o Centro Galego de Arte Contemporánea (CGAC). Na modalidade dirixida o estudantado, o xurado decidiu premiar Letting the Painting Fall / Deixar a Pintura Caer, un proxecto expositivo que o estudante de doutoramento de Belas Artes Carlos Fer desenvolveu nunha estadía de investigación en Bruxelas e no que reflexiona sobre os modos de presentación da pintura, convertendo a gravidade nunha técnica pictórica.
Trátase de teses de doutoramento, traballos fin de estudos, artigos e accións divulgativas
O Campus Auga, o proxecto de especialización do campus de Ourense acreditado pola Xunta de Galicia, recoñece cada ano cos seus Premios de Investigación, Transferencia e Divulgación Científica o talento e o esforzo do persoal investigador da Universidade de Vigo arredor das súas liñas de traballo. Na súa sétima edición, estes galardóns distinguen nove iniciativas (teses de doutoramento, traballos fin de estudos, artigos científicos e accións divulgativas) sobre alimentación funcional, agricultura e medio ambiente e xestión da auga termal.
No marco do programa interuniversitario de doutoramento que coordina a UVigo neste eido
A Facultade de Historia do campus de Ourense foi o lugar elixido para a celebración este xoves e venres das II Xornadas de Investigación en Patrimonio Cultural. A actividade estivo organizada no marco do Programa Interuniversitario de Doutoramento en Protección do Patrimonio Cultural, ofrecido polas universidades de Vigo, Santiago de Compostela e A Coruña.
As xornadas presentáronse como un espazo de encontro e intercambio científico entre o alumnado e o profesorado do programa, e contou coa participación de estudantado seu e de persoas egresadas que compartiron a súa experiencia investigadora e profesional. En total contou con 15 conferencias doutros tantos novos e novas investigadoras e unha mesa redonda de egresados e egresadas. O evento foi semipresencial, podendo seguirse de xeito presencial ou a través do Campus Remoto da UVigo. “As primeiras xornadas fixéranse en Trasalba antes da pandemia e este ano decidimos retomalas para ofrecerlle aos nosos doutorandos un punto de encontro, un espazo no que compartir procesos de investigación e xerar redes de traballo e apoio entre eles”, explicou a profesora da UVigo Beatriz Comendador, coordinadora deste programa de doutoramento.
A maioría das actividades formativas do programa, apuntou a súa responsable, son virtuais e esta actividade presencial permítelles coñecerse persoalmente, compartir os traballos que están facendo e as dificultades ante o reto de realizar a tese de doutoramento. Ademais, engadiu, este encontro é especialmente frutífero tendo en conta que este programa interuniversitario caracterízase pola súa transdiciplinariedade, reunindo investigadoras e investigadores con liñas de traballo con “metodoloxías e aproximacións ao tema de patrimonio moi diversas”, desde o xurídico ou o tecnolóxico ata o arquivístico.
A Universidade de Vigo segue a avanzar na internacionalización como unha das súas liñas estratéxicas. Na procura de darse a coñecer, captar alumnado estranxeiro e buscar posibles acordos de colaboración con institucións académicas doutros países, a UVigo participou nos últimos días nas feiras Study in Spain celebradas en Costa Rica, Colombia e Perú.
A vicerreitora de Internacionalización, Maribel del Pozo, e o director da Área de Plurilingüísimo, Óscar Ferreiro, asistiron a pasada semana ás feiras celebradas en San José de Costa Rica e Bogotá e esta semana á celebrada en Lima. A participación das universidades españolas nestas feiras vén da man do Sepie, o Servicio Español para la Internacionalización de la Educación. E é que España está á cabeza como destino elixido para realizar estudos universitarios entre o estudantado dos países de América Latina e as feiras constitúen unha ocasión única para difundir a oferta académica da UVigo e realizar accións complementarias de networking.
A vicerreitora valora moi positivamente a participación nestes tres eventos, que tiveron moitísima asistencia, “máis de 3000 persoas en cada unha das cidades” e nos que as e os asistentes “amosaron moito interese” pola Universidade de Vigo. “Estas feiras son un moi bo escaparate para as universidades españolas”, destaca del Pozo, pero fronte a outras institucións académicas máis coñecidas en América Latina “a UVigo esperta moito interese, por unha banda, polos prezos competitivos dos nosos graos, mestrados e doutoramentos e, por outra, polo feito de que a vivenda en Vigo, Ourense e Pontevedra sexa máis asumible respecto das grandes cidades”.
As nanopartículas de metais nobres son unha ferramenta para combater infeccións resistentes
Ana María Vilas Iglesias, enxeñeira industrial, estudante de doutoramento na Escola de Enxeñaría Industrial e investigadora do grupo LaserON do centro de investigación Cintecx da Universidade de Vigo, foi galardoada co terceiro premio do Laser Institute of America á mellor comunicación presentada na 44th International Conference on the Applications of Lasers and Electro-Optics, a maior do mundo no campo do procesamento de materiais láser, celebrada recentemente en Orlando, Florida, EUA.
O traballo de Ana Vilas centrouse na produción de nanopartículas bimetálicas empregando a técnica de ablación e reirradiación láser desenvolvida polo grupo LaserON. “Estou moi emocionada por este premio porque recoñece todo o traballo que levamos facendo desde hai varios anos. Cando era estudante de grao na Escola de Enxeñería Industrial de Vigo e o meu soño era dedicarme á investigación, nin sequera podía imaxinar que sería capaz de facer un traballo tan apaixoante e presentalo nun congreso nos Estados Unidos e recibir un premio así”, explica Vilas.
Participou, con Tiziana Chiusi, no inicio de curso do Doutoramento en Ordenación Xurídica do Mercado
Unha inspiración nacida da aversión non é nada novo en literatura, pero no caso de Franz Kafka, o seu exercicio profesional no eido xurídico, que el detestaba, foi unha motivación especialmente produtiva. Tanto é así, que segundo Francisco Pérez de los Cobos, expresidente do Tribunal Constitucional, “resulta imposible imaxinar a obra de Franz Kafka desligada da súa condición de xurista”. O catedrático de Dereito do Traballo e da Seguridade Social da Universidade Complutense de Madrid fixo esta reflexión este mércores na Facultade de Ciencias Xurídicas e do Traballo no marco da xornada de relatorios que serviu como apertura de curso do Programa de Doutoramento en Ordenación Xurídica do Mercado.
A intervención de Pérez de los Cobos xirou arredor da relación de Kafka co dereito, prestando especial atención á análise xurídica de A metamorfose. O evento arrancou coas intervencións de Francisco Torres, decano da Facultade de Ciencias Xurídicas e do Traballo; Antonio Collazo, director da Escola Internacional de Doutoramento da UVigo e Pablo Raúl Bonorino, coordinador do Programa de Doutoramento, que foron os encargados de dar a benvida aos poñentes e asistentes que ateigaron o salón de graos da facultade e de presentar as novas liñas de investigación do programa.
A xornada contou tamén coa participación de Tiziana Chiusi, catedrática de Dereito civil, Dereito romano e Dereito europeo comparado, directora do Instituto de Dereito Europeo e docente na Universidade do Sarre (Alemaña), que ofreceu un relatorio sobre os lugares da memoria en Europa, lugares fundadores da identidade europea.
O curso pasado concedéronse 37 bolsas para fin de grao, 23 para fin de mestrado e catro para teses
A presenza do galego no eido da investigación e a ciencia é escaso e para mudar esa situación son precisas de medidas de apoio, fomento e impulso ao uso da lingua propia neste eido. Entre outras iniciativas, a Universidade de Vigo conta cunha liña de axudas para redactar e defender en galego teses de doutoramento, traballos de fin de grao e de mestrado. Ao abeiro desta convocatoria, o curso pasado concedéronse 37 bolsas para traballos de fin de grao, 23 para traballos de fin de mestrado e catro para teses de doutoramento.
As persoas interesadas en concorrer a estas axudas impulsadas pola Área de Normalización Lingüística xa teñen aberto o prazo da nova convocatoria, para investigacións presentadas na Universidade de Vigo entre o 16 de setembro de 2024 e o 15 de setembro de 2025. Como vén sendo habitual, quedan excluídos os traballos fin de grao de Ciencias da Linguaxe e Estudos literarios (módulo de lingua galega); Tradución e Interpretación (galego-inglés) e Tradución e Interpretación (galego-francés).
En total repartiranse 12.000 euros, 600 euros para os autores e autoras das mellores teses e 150 para os TFG e os TFM. Trátase non só de incentivar o uso do galego nos traballos académicos, senón tamén de premiar o esforzo e o rigor de darlle un tratamento coidadoso á lingua incrementando así o patrimonio dos textos redactados.
A conferencia plenaria correrá a cargo da profesora da Universitat de Barcelona, Helena González
A Facultade de Filoloxía e Tradución volverá converterse este mes en sede dunha nova edición do Coloquio Internacional en Estudos Literarios, unha cita que este curso acada xa a súa terceira edición. Será o vindeiro xoves e venres, 9 e 10 de outubro, nun encontro organizado polo Programa de Doutoramento Interuniversitario en Estudos Literarios das Universidades de Vigo e da Coruña, o Grupo de Investigación BiFeGa e a Cátedra Internacional José Saramago da Universidade de Vigo.
O evento vai dirixido ás novas investigadoras e investigadores, preferentemente da UVigo e da UdC, mais tamén doutras universidades. Precisamente para favorecer a asistencia da comunidade científica internacional, sobre todo do mundo lusófono, desenvolverase en formato presencial e en liña, o que facilitará a asistencia de numerosos representantes, tanto de universidades portuguesas como brasileiras.
Coordinado polo profesor Burghard Baltrusch, director do grupo BiFeGa, a idea é seguir a promover e afondar na cooperación e no diálogo entre as dúas universidades vencelladas ao Programa de Doutoramento en Estudos Literarios e aos diferentes grupos de investigación asociados, así como facilitar o intercambio de coñecementos e experiencias das mozas e mozos que se están a incorporar ao mundo da investigación no eido dos estudos literarios e culturais, tanto en Europa como en América.
Repartiranse 5300 euros entre un total de nove galardóns
A Universidade de Vigo abre a convocatoria dunha nova edición dos Premios Egeria á inclusión da perspectiva de xénero en TFG, TFM e teses para o curso 2024/2025. Estes galardóns, que naceron en 2014 da man da Unidade de Igualdade, teñen como obxecto recoñecer, difundir e premiar os mellores traballos de fin de grao, de mestrado e teses de doutoramento que inclúan a perspectiva de xénero e/ou feminista realizados polo estudantado da institución académica olívica.
Nesta décimo segunda edición mantéñense as mesmas condicións, estrutura e contías que no ano pasado. O prazo de presentación de candidaturas está aberto ata o vindeiro 9 de outubro e poden participar todos os alumnos e alumnas da UVigo que teñan presentado o traballo fin de grao ou fin de mestrado no curso 2024/2025 cunha cualificación mínima de 9 ou que teñan defendido a tese de doutoramento entre o 1 de outubro de 2024 e o 30 de setembro de 2025 obtendo a cualificación de “sobresaínte cum laude”.