A Universidade de Vigo segue a avanzar na internacionalización como unha das súas liñas estratéxicas. Na procura de darse a coñecer, captar alumnado estranxeiro e buscar posibles acordos de colaboración con institucións académicas doutros países, a UVigo participou nos últimos días nas feiras Study in Spain celebradas en Costa Rica, Colombia e Perú.
A vicerreitora de Internacionalización, Maribel del Pozo, e o director da Área de Plurilingüísimo, Óscar Ferreiro, asistiron a pasada semana ás feiras celebradas en San José de Costa Rica e Bogotá e esta semana á celebrada en Lima. A participación das universidades españolas nestas feiras vén da man do Sepie, o Servicio Español para la Internacionalización de la Educación. E é que España está á cabeza como destino elixido para realizar estudos universitarios entre o estudantado dos países de América Latina e as feiras constitúen unha ocasión única para difundir a oferta académica da UVigo e realizar accións complementarias de networking.
A vicerreitora valora moi positivamente a participación nestes tres eventos, que tiveron moitísima asistencia, “máis de 3000 persoas en cada unha das cidades” e nos que as e os asistentes “amosaron moito interese” pola Universidade de Vigo. “Estas feiras son un moi bo escaparate para as universidades españolas”, destaca del Pozo, pero fronte a outras institucións académicas máis coñecidas en América Latina “a UVigo esperta moito interese, por unha banda, polos prezos competitivos dos nosos graos, mestrados e doutoramentos e, por outra, polo feito de que a vivenda en Vigo, Ourense e Pontevedra sexa máis asumible respecto das grandes cidades”.